“Rezultati i MRI‑së tregon një çarje të meniskut. A duhet patjetër të bëj operacion?”
Këtë pyetje e dëgjoj pothuajse çdo javë disa herë. Dhe në shumicën e rasteve përgjigjja ime i surprizon pacientët:
Jo. Jo çdo çarje e meniskut kërkon operacion.
Kur njerëzit dëgjojnë termin “çarje e meniskut”, shpesh mendojnë menjëherë për operacion. Në fakt kjo është një mënyrë e vjetër të menduari. Sot e dimë se vendimi për trajtim nuk duhet të merret vetëm duke parë MRI‑në. Më e rëndësishmja janë simptomat e pacientit dhe gjendja klinike e gjurit.
Meniskët janë dy struktura kërcore në formë gjysmëhëne brenda nyjës së gjurit. Ato funksionojnë si një jastëk midis femurit dhe tibisë.
Funksionet kryesore janë:
- shpërndarja e ngarkesës në gju
- absorbimi i goditjeve
- mbrojtja e kërcit të nyjës
- stabiliteti i gjurit
Kur menisku është i shëndetshëm ai mbron kërcin e gjurit. Por kur dëmtohet rëndë ose kur një pjesë e madhe hiqet, rreziku për osteoartrit rritet me kalimin e kohës.
Jo çdo çarje është e njëjtë
Çarjet e meniskut ndahen në dy grupe kryesore:
Çarje traumatike
Shfaqen zakonisht tek të rinjtë dhe njerëzit aktivë. Mund të ndodhin gjatë sportit pas një rrotullimi të papritur të gjurit.
Çarje degjenerative
Janë më të zakonshme pas moshës 40 vjeç. Shpesh nuk ka histori të qartë traume dhe mund të lidhen me konsumimin e nyjës së gjurit.
Pyetja kryesore është:
A po e shkakton dhimbjen çarja apo një problem tjetër në gju?
Kur operacioni nuk është i nevojshëm?
Në këto raste zakonisht preferohet trajtim pa operacion:
- nuk ka bllokim të gjurit
- dhimbja mund të kontrollohet
- aktivitetet e përditshme mund të vazhdojnë
- çarja është e vogël dhe degjenerative
Trajtimi mund të përfshijë:
- ushtrime për forcimin e muskujve të kofshës
- fizioterapi
- kontroll të peshës
- ndryshim të aktiviteteve
- injeksione kur është e nevojshme
Kur duhet menduar operacioni?
Në disa raste operacioni mund të jetë i nevojshëm.
Bllokimi i gjurit
Nëse gjuri nuk mund të përkulet ose të drejtohet plotësisht, një fragment i meniskut mund të jetë bllokuar në nyje.
Pacientë të rinj dhe aktivë
Çarje të mëdha tek sportistët mund të jenë të përshtatshme për riparim kirurgjikal.
Dhimbje që nuk kalon
Nëse pas disa javësh trajtimi konservativ nuk ka përmirësim.
Përfundim
Jo çdo çarje e meniskut kërkon operacion. Vendimi duhet të merret pas një vlerësimi të plotë ortopedik.
